Einarsen Eigedom AS styrkjer si satsing på eigedomsforvaltning og eigedomsdrift ved å kjøpe 100 prosent av aksjane i Sogn Eigedomsdrift AS. Overtakinga trer i kraft frå 1. oktober 2024.
– Med dette kjøpet tar me eit nytt steg i retning av å tilby heilskaplege tenester innan eigedom. Sogn Eigedomsdrift har opparbeidd seg eit godt rykte som ein påliteleg aktør innan drift og vedlikehald, og me ser fram til å vidareutvikle selskapet saman med dei tilsette og kundane, seier Frode Einarsen, dagleg leiar i Einarsen Eigedom AS.
Sogn Eigedomsdrift AS har i dag ansvar for teknisk drift og vedlikehald av fleire næringseigedomar i Sogndal, mellom anna Sjøkanten, Granden og området rundt busstasjonen. Selskapet har hatt ein sentral rolle i å sikre stabil og effektiv drift for både eigedomseigarar og leigetakarar.
– Me har planar om å vidareutvikle tenestene, investere i nytt utstyr og styrkje laget med nye medarbeidarar. Dette vil gjere oss betre rusta til å møte behovet for profesjonell eigedomsdrift i regionen, fortel Einarsen.
Hans Martin Brusegard, som har leia Sogn Eigedomsdrift, vil bidra i overgangen for å sikre ei smidig overtaking. Svein Arne Thue er tilsett som ny driftssjef og skal leie den vidare utviklinga av driftsorganisasjonen.
Kjøpet er ein del av ein større strategi for å byggje opp ein sterk og framtidsretta eigedomsaktør i Sogn.
