ETABLERER NY BUTIKK PÅ BILLAGSTOMTA I SOGNDAL SENTRUM
REMA 1000 Norge AS har signert ein intensjonsavtale med Sogndalsporten Utvikling AS om etablering av ein ny REMA 1000-butikk på Billagstomta i Sogndal sentrum. Etableringa markerer eit viktig steg i utviklinga av eit nytt og moderne «byområde» i hjartet av Sogndal.
– Med ein ny butikk på Billagstomta sikrar me oss den beste plasseringa for handel i sentrum – med parkering under tak, bussterminal og god tilkomst, seier etableringsdirektør Magne Jan Vik i REBUS Handelseiendom AS.
REMA 1000 har allereie to butikkar i Sogndalsfjøra og ein marknadsdel på nær 50 prosent. Den nye etableringa vil styrke kjeda si lokale forankring ytterlegare.
– Gjennom vår franchisemodell blir butikken drive av ein lokal kjøpmann gjennom sitt eige firma. Det betyr at verdiskapinga skjer lokalt. REMA 1000 er i dag den einaste daglegvareaktøren i Sogndal med lokaleigde butikkar, og det meiner me er viktig for å sikre at mest mogleg av det kundane handlar for blir lagt igjen i bygda, seier regionsdirektør Jan Arild Byttingsvik i REMA 1000.
Rema 1000 har lang tradisjon for lokalt eigarskap i Sogndal
Butikkane blir drivne av lokale kjøpmenn som bidreg til arbeidsplassar, innkjøp og skatteinntekter i bygda.
Rema 1000 Sogndal blir drive av Sjøkanten Mat AS ved kjøpmann Mona Lie, medan Rema 1000 Amfi Sogningen blir drive av Thorbjørn Myklebust AS ved kjøpmann Thorbjørn Myklebust.
Ifølgje DNB si ringverknadsanalyse vil dei to butikkane til saman bidra med over 40 millionar kroner til samfunnet i 2025, gjennom skattar, avgifter, løn og lokale innkjøp.
I tillegg skaper dei lokale arbeidsplassar og kjøpekraft:
Over 40 tilsette som legg igjen om lag 6,7 millionar kroner i lokalt forbruk
Over 50 indirekte arbeidsplassar hjå lokale leverandørar og samarbeidspartnarar
Eit nytt tyngdepunkt i sentrum
Billagstomta blir utvikla til eit levande kvartal med leilegheiter, handel, servering og tenester, i tillegg til ny bussterminal. Næringsareala får god kundeparkering under bussterminalen, med innkøyring like ved dagens rundkøyring. Det blir i tillegg etablert god parkering for syklar i tillegg til direkte tilkomst frå gate og bussterminal. Området vil bli svært sentralt og tilgjengeleg for alle som bur eller skal igjennom sentrum.
Den planlagde REMA 1000-butikken vil få ei synleg plassering på gateplan, med enkel tilkomst for både bilistar og gåande. Over butikken kjem endå ein etasje med plass til fleire verksemder. Utviklarane ser for seg eit mangfald av tilbod som apotek, frisør, butikkar, treningssenter, kiosk og bakeri – funksjonar som skal bidra til aktivitet gjennom heile dagen.
Ein særleg fordel med prosjektet er at dei som kjøper leilegheit i bygget, vil kunne ta heisen direkte ned til matbutikken. Dette gir høg grad av komfort og praktisk tilgjenge for bebuarane — enkel daglegvarehandel utan å måtte gå ut, og med trygg tilkomst heile året, også i dårleg ver.
Bussterminalen, som i dag har om lag 1000 på- og avstigande passasjerar dagleg, vil med dei nye tilboda kunne få mellom 2000 og 3000 besøkande dagleg når alt opnar.
Byggestart er planlagd i 2027, og den nye butikken skal stå klar for opning i løpet av 2028/2029.
Val av Rema 1000
Ifølgje Frode Einarsen, utleigeansvarleg i Sogndalsporten Utvikling AS, var interessa stor for lokala som var sett av til daglegvarebutikk.
– Alle dei fire store kjedene i landet fikk anledning til å vurdere prosjektet og gi tilbod på leige av lokala. Etter ei samla vurdering av konsept, leigepris og merkevare landa styret på at REMA 1000 Norge AS var riktig leigetakar, fortel Einarsen.
Han meiner valet av REMA 1000 er viktig for prosjektet og for Sogndal som regionalt handelspunkt.
– REMA 1000 driv på franchise, der ein lokal kjøpmann eig og styrer butikken sjølv. Dette gir ei heilt anna lokal verdiskaping enn ein filialbutikk med hovudkontor i byen – Sogndal treng fleire lokale bedrifter. Me er glade for å ha fått med ein solid og lokalengasjert aktør som første leigetakar i prosjektet.
Også styreleiar i Sogndalsporten Utvikling AS, Magnus Indrebø, er nøgd med at REMA 1000 går inn.
– Billagstomti blir eit nøkkelprosjekt for å styrke sentrum. Me ønskjer å skape eit område som er funksjonelt, frodig og aktivt – der handel, service, bustad og kollektivtilbod møtest på ein ny måte. Det at REMA 1000 går inn som første leigetakar, er eit viktig kvalitetsstempel for prosjektet.
Miljø og berekraft
Utviklingsselskapet legg vekt på miljø og berekraft i planlegginga. Prosjektet skal ha låg energibruk, fokus på grøn mobilitet og moderne tekniske løysingar. Det blir lagt til rette for fjernvarme, elbillading og effektiv arealutnytting for å skape eit framtidsretta og miljøvennleg sentrumsmiljø.
Fakta om Billagstomti-prosjektet
Utviklar: Sogndalsporten Utvikling AS
Storleik: ca. 20 000 kvm
Næringsareal: ca. 4 000 kvm
Bustader: ca 200 leilegheiter
Parkering: ca. 200 plassar under tak
Byggestart: 2027
Arkitekt: LOF Arkitekter AS
For meir informasjon:
Rema 1000 Norge AS
Jan Arild Byttingsvik, Regionssjef
E-post: jan.byttingsvik@rema.no
Telefon: 913 20 266
Sogndalsporten Utvikling AS
Christian Støer, Dagleg leiar
E-post: Christian.Stoer@allstad.no
Telefon: 98406149